सवारी दुर्घटनामा तीन जनाको मृत्यु

काठमाडौं । तनहुँ, शुक्लागण्डकी नगरपालिका १२ पिउरी दोभानस्थित सडकमा दुलेगौँडाबाट पिउरीदोभानतर्फ जाँदै गरेको ग १ ज ७९४२ नम्बरको जीप अनियन्त्रित भई आइतबार साँझ दुर्घटना हुँदा जिपमा सवार स्याङ्जा पुतलीबजार नगरपालिका ६ बस्ने ३९ वर्षीय कुल बहादुर सुनारको घटनास्थलमै मृत्यु भएको छ । साथै दुर्घटनामा घाइते भएका अन्य ७ जनालाई जि पि कोईराला श्वासप्रश्वास केन्द्र बेलचौतारा पठाइएकोमा ६ जनालाई थप उपचारको लागि गण्डकी अस्पताल रिफर गरिएको छ ।

नवलपरासी (पश्चिम), रामग्राम नगरपालिका १७ पठ्खौलीस्थित सडकमा प्रदेश २-०३-००१ क ११३२ नम्बरको टिपरको ठक्करबाट साइकलयात्री सोही नगरपालिका १२ कुनवार बस्ने ६० वर्षीय गणेश प्रसाद हरिजनको आइतबार साँझ मृत्यु भएको छ । दुर्घटनामा गम्भीर घाइते भएका उनको जिल्ला अस्पताल परासीमा उपचारको क्रममा मृत्यु भएको हो । टिपर चालकलाई प्रहरीले नियन्त्रणमा लिएको छ ।

सिरहा, सखुवानान्कारकटी गाउँपालिका ३ परियारपुर चोकस्थित सडकमा प्र २-०१-००३ प ३२८९ नम्बरको मोटरसाइकल र स ४ प ५५१६ नम्बरको मोटरसाइकल एक-आपसमा ठक्कर खाई आइतबार राति दुर्घटना हुँदा प्र २-०१-००३ प ३२८९ नम्बरको मोटरसाइकलमा सवार सोही गाउँपालिका ४ बस्ने २२ वर्षीय अमित पासवानको मृत्यु भएको छ । दुर्घटनामा गम्भीर घाइते भएका उनको प्रादेशिक अस्पताल लहानमा उपचारको क्रममा मृत्यु भएको हो । दुवै मोटरसाइकलका चालकलाई प्रहरीले नियन्त्रणमा लिएको छ ।