काठमाडौं । कास्की, रूपा गाउँपालिका ७ तालबेशीस्थित सडकमा तालबेशीबाट काउरेतर्फ जाँदै गरेको बा ४ ख १६४ नम्बरको मिनी टिपर आइतबार राति दुर्घटना हुँदा टिपरमा सवार नुवाकोट घर भएका २९ वर्षीय राम तामाङको मृत्यु भएको छ । दुर्घटनामा गम्भीर घाइते भएका उनको पश्चिम क्षेत्रीय अस्पतालमा उपचारको क्रममा मृत्यु भएको हो । साथै दुर्घटनामा घाइते भएका टिपर चालकको सोही अस्पतालमा उपचार भइरहेको छ ।
रौतहट, राजदेवी नगरपालिका ७ मुडवलवा गेट नजिक सडकमा हाल नम्बर नखुलेको मोटरसाइकलको ठक्करबाट सोही नगरपालिका ७ बस्ने ८५ वर्षीय नेमी लाल साहको मृत्यु भएको छ । गत शनिबार दिउँसो उक्त मोटरसाइकलले ठक्कर दिँदा गम्भीर घाइते भएका उनको भारतको सितामढीस्थित अस्पतालमा उपचारको क्रममा आइतबार दिउँसो मृत्यु भएको हो । हाल फरार मोटरसाइकल र चालकको प्रहरीले खोजी गरिरहेको छ ।
प्युठान, सरुमारानी गाउँपालिका ६ मोतिपुरस्थित सडकमा बिजुवारदेखि दाङतर्फ जाँदै गरेको लु ३ च ३८५५ नम्बरको पिकअप गाडी अनियन्त्रित भई आइतबार दिउँसो दुर्घटना हुँदा गाडीमा सवार दाङ लमही नगरपालिका ७ नयाँबस्ती बस्ने २२ वर्षीय सत्यनारायण चौधरीको मृत्यु भएको छ । दुर्घटनामा गम्भीर घाइते भएका उनको जिल्ला अस्पताल बिजुवार प्युठानमा उपचारको क्रममा मृत्यु भएको हो । साथै दुर्घटनामा गम्भीर घाइते भएका गाडी चालक सहित २ जनाको लुम्बिनी सिटी अस्पताल बुटवलमा उपचार भइरहेको छ ।
सप्तरी, खडक नगरपालिका ७ कल्याणपुर बजारस्थित सडकमा बा।३ च ५२९३ नम्बरको कारमा को।१५ प १९१ नम्बरको मोटरसाइकल ठक्कर खाई आइतबार दिउँसो दुर्घटना हुँदा मोटरसाइकलमा सवार उदयपुर त्रियुगा नगरपालिका ९ बगाटोल बस्ने ३६ वर्षीय ध्रुव बस्नेतकी छोरी १० वर्षीया एंजिला बस्नेतको मृत्यु भएको छ । उक्त मोटरसाइकल कारमा ठक्कर खाई पुन ना ६ ख ९८५२ नम्बरको ट्रकको पछाडी समेत ठक्कर खाई दुर्घटना हुँदा गम्भीर घाइते भएकी उनको छिन्नमस्ता अस्पताल राजबिराज सप्तरीमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालक ध्रुव बस्नेतको सोही अस्पतालमा उपचार भइरहेको छ । तीन वटै सवारी साधन तथा कार र ट्रकका चालकलाई प्रहरीले नियन्त्रणमा लिएको छ ।
महोत्तरी, बर्दिबास नगरपालिका ३ पाटुस्थित सडकमा सिन्धुली भिमानबाट बर्दिबासतर्फ जाँदै गरेको ना।८ ख २०४६ नम्बरको टिपर आफै अनियन्त्रित आइतबार दिउँसो दुर्घटना हुँदा टिपरका सह-चालक धनुषा लक्ष्मीनिया गाउँपालिका बस्ने २८ वर्षीय दिपेन्द्र महतोको मृत्यु भएको छ । दुर्घटनामा गम्भीर घाइते भएका उनको बर्दिबासस्थित जनसेवा अस्पताल हुँदै न्यूरो अस्पताल जनकपुरमा थप उपचारको क्रममा मृत्यु भएको हो । साथै दुर्घटनामा घाइते भएका टिपरका चालक समेत २ जनाको बर्दिबासस्थित जनसेवा अस्पतालमा उपचार भइरहेको छ ।
बर्दिया, बारबर्दिया नगरपालिका ६ धामपुरस्थित सडकमा रम्मापुरबाट जयनगरतर्फ जाँदै गरेको भे।११ प ७४१६ नम्बरको स्कुटरको ठक्करबाट पैदलयात्री सोही नगरपालिका ६ धामपुर बस्ने ८१ वर्षीया देबकी गिरीको मृत्यु भएको छ । स्कुटर चालकलाई प्रहरीले नियन्त्रणमा लिएको छ ।
दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
प्रतिक्रिया लेख्नुहोस्:-