जापान विदेशी नागरिकमाथि लगाएको यात्रा प्रतिबन्ध खुलाउदै

एनएचके । जापानले कारोना भाइरसका कारण विदेशी नागरिकहरूमाथि लगाएको यात्रा प्रतिबन्ध पर्यटकबाहेकका लागि सोमबारदेखि आंशिक रूपमा खुलाउने भएको छ ।

लामो समयसम्म जापानमा रहने विदेशी विद्यार्थीहरू, प्राविधिक प्रशिक्षार्थीहरू सँगै अल्पकालका लागि व्यवसाय र कामको उद्देश्यले तीन महिनासम्म रहनेहरूका लागि नयाँ मापदण्ड लागु हुनेछ ।

विदेशीलाई जापान भित्र्याउने कम्पनीहरू र विद्यालय जस्ता संस्थाहरूले उनीहरूको प्रवेश सुनिश्चित गर्न सम्बन्धित मन्त्रालयले गर्ने परीक्षण पूरा गर्नुपर्नेछ ।

प्रवेशीहरूलाई खाने बस्ने सुविधान प्रदान गर्न सम्बन्धित संस्थाहरू जिम्मेवार हुनेछन् । त्यस्ता ठाउँहरूमा प्रवेशीहरू १४ दिन सम्म सेल्फ–क्वारेन्टिनमा बस्न सक्नेछन् ।
सरकारले प्रतिदिन ३५ सय जना विदेशीलाई मात्र प्रवेश गर्न दिने प्रावधानलाई निरन्तरता दिनेछ । यस प्रावधानले गर्दा जापान प्रवेश गर्न केही समय लाग्न सक्ने अधिकारीले बताएका छन् ।