काठमाडौं २१ साउन । नेपालमा आउने भनिएको कोरोना महामारीको तेस्रो लहर आइसकेको संकेत चिकित्सकहरूले गरिसकेका छन् । यो एक सातामा काठमाडौंलगायत अन्य स्थानका स्वास्थ्यसंस्थामा संक्रमित बिरामीको थेगिनसक्नु आगमनसँगै तेस्रो लहर भित्रिएको हुन सक्छ । त्यसैले अब साँच्चै नै विशेष सर्तक हँुदै सावधानी अपनाउनुपर्छ ।
टेकुस्थित शुक्रराज ट्रपिकल तथा सरुवा रोग अस्पतालले तेस्रो लहर सुरु भइसकेको हुँदा यसलाई थेग्न सम्बन्धित अभिभावक निकाय सतर्क हुनुपर्ने कुरा आंैल्याइरहेको छ । हाल टेकु अस्पतालका बेडमा कोरोना संक्रमित बिरामी खचाखच भरिएका छन् । अस्पतालका निर्देशकले यसलाई तेस्रो लहर सुरु भएको संकेतका रूपमा आफूहरूले सामना गरिरहेको बताएका छन् । पछिल्लो एक सातादेखि नै टेकुलगायत अन्य अस्पतालमा संक्रमित बिरामीको चाप बढ्न थालिसकेको थियो । भर्खरै मात्र काठमाडौं उपत्यकामा निषेधाज्ञा थप लम्ब्याए पनि त्यो निर्णय दोस्रो लहरको बढ्दो प्रभावका आधारमा लिइएको थियो । अब परिस्थितिले कोल्टे फेरिसकेको छ । निषेधाज्ञा, स्मार्ट लकडाउन वा लकडाउन आदि कुरा चर्चामा आइरहेका छन् । अर्कोतिर अस्पतालमा कोरोना उपचारका लागि छुट्याइएका बेड खाली छैनन् । कोरोना कक्ष र स्थान विस्तारका लागि स्थान अभाव छ । नेपालको एक मात्र सरुवा रोग अस्पताल टेकुमा संक्रमितका लागि बनाइएको वार्डमा छुट्याइएका ४० वटै बेडमा बिरामी टन्न भरिइसकेका छन् ।
त्यहाँ अहिले इमर्जेन्सी तथा गम्भीर बिरामीका लागि भनी बनाइएको २४ बेडको आईसीयू कक्षमा २३ जना जटिल अवस्थाका संक्रमित बिरामीको उपचार भइरहेको छ । यीमध्ये २० भन्दा बढी बिरामी भेन्टिलेटरको सहायतामा बाँचिरहेका छन् । उपत्यकाका अन्य अस्पताल पनि भरिभराउ हुन थालेका छन् । कतिपय अस्पतालले त अब कोरोना संक्रमित बिरामीको उपचारका लागि बेड नै नभएको सार्वजनिक घोषणा गरिरहेका छन् । बिरामीका लागि अभाव हुने गरेको अक्सिजन अहिले पनि बजारमा अभाव नै छ । उता थप संक्रमित बिरामी आउँदा तिनको उपचारका लागि अस्थायी टहरामा र बेड बनाएर उपचार थालिएको छ । बिरामीका लागि डाक्टर र नर्सहरू पर्याप्त मात्रामा छैनन् । अबका दिनमा अस्पतालमा उपलब्ध उपकरणले पनि आगामी कामलाई गति दिनेछैन । महामारीले च्याप्दै लगेको अनुपातमा उपकरण, औषधि तथा आवश्यक सामग्रीको जोहो समयमै गरिनुपर्छ । अर्कोतिर, संक्रमण उपचारको अग्रमोर्चाका खटिरहेका लागि आवश्यक भौतिक तथा अन्य सेवासुविधा प्रदान गर्ने प्याकेज कार्यक्रमको घोषणा गरिनुपर्छ । बिरामीका लागि खोप तथा अन्य आवश्यक औषधिको मूल्य निर्धारण, अनुगमन, निरीक्षण र मूल्यांकन गरिनुु जरुरी हुन गएको छ ।
हालका लागि देशमा उपलब्ध खोप विस्तार, अन्य अपुग खोप आयातका लागि निरन्तर पहल, अनुदान खोप ल्याउन प्रभावकारी कूटनीतिक वार्ता र खरिद गरेर ल्याउने खोपका लागि खरिद प्रक्रिया शीघ्रातिशीघ्र अघि बढाउनुपर्छ । यो निकै जरुरी पनि छ । अर्कोतिर महामारीविरुद्धको लडाइँ सरकारवादी लडाइँ मात्र होइन, जनताको आफ्नै लडाइँ पनि हो । यो आफैंमा महामारीविरुद्ध सार्वजनिक लडाइँ पनि हो । जसमा जनताको स्वसहभागिता निर्णायक हुन आउँछ । त्यसैले जनताले पनि कोरोना महामारीको पहिलो लहर आउँदा अपनाइनुपर्ने सतर्कतामा जेजस्ता गल्ती गरेका थियौं । तिनै गल्ती दोहर्याइरहेकाले दोस्रो लहरपछि पनि यो हालत बेहोर्नुपरेको कुरा निकै गहिराइका साथ मनन गर्नुपर्छ ।
प्रतिक्रिया लेख्नुहोस्:-