पोखरा / पोखरामा पहिलो पटक आयोजना भएको पोखरा फुटसल लिगको विवाद सहमतिमा टुंगिएको छ ।
सिंगल राउन्डरोविन लिगमात्रै खेलाउने गरि आयोजना भएको प्रतियोगितामा नकआउट खेल समेत हुने भएपछि भएको विवाद सोमबार समाधान भएको हो ।
आयोजक पोखरा क्यापिटल एफसी र लिगको शीर्षस्थानमा रहेको टोली बीच सहमति भएपछि फाइनल खेल्न राजी भएको हो । खेल परिणामलाई लिएर देखिएको विवाद आपसी सहमतिमा शान्तिपूर्ण रूपमा समाधान भएको छ ।
विवादको सफल निरूपण भएपछि काठमाडौँको बौद्ध–६ मा रहेको बौद्ध अजिमा समाजले एक पत्र जारी गर्दै सम्बद्ध सबै पक्षलाई धन्यवाद ज्ञापन गरेको छ ।
समाजका सचिव सञ्जीव लामाद्वारा जारी विज्ञप्तिमा लिग आयोजक ’पोखरा क्यापिटल्स एफसी’ ले देखाएको तत्परता र चासोलाई सम्बोधन गर्न गरेको प्रयासको उच्च प्रसंशा गरिएको छ ।
साथै, विवादको समयमा पनि खेल भावना र धैर्यता कायम राखेकोमा सहभागी टोली, खेलाडी, रेफ्री, प्राविधिक पदाधिकारी र समर्थकहरू प्रति आभार प्रकट गरिएको छ ।
विवादको मैत्रीपूर्ण समाधानले प्रतियोगिताको गरिमा बचाउनुका साथै पोखरा र समग्र नेपालकै महिला फुटसलको भविष्यलाई थप मजबुत बनाएको बौद्ध अजिमा समाजले जनाएको छ । आगामी दिनमा पनि यस्ता सहकार्यले देशमा महिला फुटबलको विकासमा टेवा पुग्ने विश्वास समाजले व्यक्त गरेको छ ।
प्रतिक्रिया लेख्नुहोस्:-