सवारी दुर्घटनामा तीन जनाको मृत्यु

काठमाडौं, १ भदौ । देशका विभिन्न स्थानमा भएका छुट्टाछुट्टै सवारी दुर्घटनामा तीन जनाको ज्यान गएको छ ।

मोरङमा मोटरसाइकल दुर्घटना
मोरङको मिक्लाजुङ गाउँपालिका–३ टाँडी रमितेस्थित सडकमा मे.२ प ९०९७ नम्बरको मोटरसाइकल शनिबार दिउँसो अनियन्त्रित भई दुर्घटना हुँदा चालक उर्लाबारी नगरपालिका–४ बस्ने १७ वर्षीय आरब डाँगीको मृत्यु भएको छ । गम्भीर घाइते भएका डाँगीलाई उपचारका लागि अरनिको अस्पताल उर्लाबारी पुर्याइएको थियो तर उपचारको क्रममा उनको मृत्यु भएको हो ।

सिराहामा पैदलयात्रीलाई ठक्कर
सिराहाको लहान नगरपालिका–१९ छरापट्टीस्थित सडकमा बीआर ३२ एसी ४१२९ नम्बरको मोटरसाइकलले ठक्कर दिँदा सोही नगरपालिका–२३ गढीया बस्ने ५५ वर्षीय पैदलयात्री लखन मोतीको शनिबार राति मृत्यु भएको छ । गम्भीर घाइते भएका मोतीलाई प्रादेशिक अस्पताल लहान पुर्याइएकोमा उपचारको क्रममा मृत्यु भएको हो । दुर्घटनापछि मोटरसाइकल चालक फरार रहेकाे र उनको खोजी भइरहेको प्रहरीले जनाएको छ ।

रूपन्देहीमा ठक्कर
रूपन्देहीको बुटवल उपमहानगरपालिका–१३ जितगढीस्थित सडकमा लु.१ ज ४४६६ नम्बरको बलेरोले लु.१५ प ३४ नम्बरको मोटरसाइकललाई शनिबार राति ठक्कर दिँदा अर्घाखाँची सन्धिखर्क नगरपालिका–४ वाग्ला बस्ने ३१ वर्षीय खुमा भुसालको मृत्यु भएको छ । दुर्घटनामा गम्भीर घाइते भएका उनलाई उपचारका लागि लुम्बिनी प्रादेशिक अस्पताल बुटवल लगिएकोमा उपचारकै क्रममा निधन भएको हो । यस दुर्घटनामा मोटरसाइकलमा सवार थप एक जना घाइते भएका छन् जसको बुटवलस्थित एडमसिटी अस्पतालमा उपचार भइरहेको छ । ठक्कर दिने बलेरो चालक फरार रहेकाे र उनको खोजी भइरहेको प्रहरीले जनाएको छ ।