यही शुक्रबारदेखि प्रदर्शनमा आउने तयारीमा रहेको फिल्म ताण्डवम् को सेन्सर रोकिएको छ।
केन्द्रीय चलचित्र जाँच समितिले फिल्ममा समावेश हिंसात्मक दृश्यमा आपत्ति जनाउँदै प्रदर्शन अनुमति दिन अस्वीकार गरेको छ। ति दृश्यलाई हटाएर ल्याउन चलचित्र जाँच समितिले आग्रह गरेको हो। मंगलबार बेलुका यो फिल्म जाँच गरिएको थियो।
फिल्म हेरेपछि सेन्सर बोर्डका सदस्यहरूले अत्याधिक हिंसात्मक दृश्य भएको भन्दै ति दृश्य काटेर ल्याउन भनेको निर्देशक जुनिम गहतराजले बताए। फिल्ममा रहेको हिंसात्मक दृश्यलाई घटाउन निर्देशन आएको निर्देशक गहतराजले बताए।
फिल्मको नामै ताण्डवम् छ। अब ति दृश्य काट्दा मर्म पनि बिग्रन्छ, उनले भने। बोर्डले हिंसात्मक भनेका दृश्यलाई काटेर पुनः सेन्सरका लागि पेस गर्ने उनले बताए। उनका अनुसार अब बिहीबार जाँच गरिनेछ।
सेन्सर रोकिएसँगै फिल्मको बुधबार हुने भनिएको प्रिमियर शो समेत स्थगित गरिएको छ। यो फिल्ममा पुष्कर गुरूङ, प्रेम सुब्बा, जुनिम गहतराज, अंकित खड्का, सरिना मगर, अनोज पाण्डे, कमल कार्की र गोपाल कटुवाल लगायतको अभिनय छ।
एक नव–विवाहित जोडीले पहिलो सन्तानको स्वागतको तयारी गरिरहँदा उनीहरूको जीवनमा घट्ने अकल्पनिय घटनाले निम्त्याउने उतारचढावको कथालाई पारिवारिक तथा एक्सन थ्रिलर जनरामा प्रस्तुत गरिएको छ।
फिल्मको निर्माता धनकुमारी गहतराज, सविना मगर र मनिष गौतम हुन् ।
प्रतिक्रिया लेख्नुहोस्:-