नयाँ दिल्ली – भारतीय हवाईजहाज कम्पनीहरूलाई केही समययता लगातार बमले उडाइदिने धम्की आउन थालेको छ ।
भारतका चर्चित इन्डिगो र भिस्तरासमेत कयौँ कम्पनीका जहाजहरू बमले उडाउने धम्की आइरहेको हो ।
मंगगलबार मात्रै दुवै एयरलाइन्सका १०-१० जहाजलाई बमले उडाइदिने धम्की आएको हो ।
पछिल्ला केही दिनयता भारतीय एयरलाइन्सलाई निशाना बनाउँदै यस्ता धम्कीसहितका फोन र ईमेल लगातार आइरहेका छन् ।
इन्डिगो एयरलाइन्सले मंगलबार आफ्ना १० उडानमा धम्की मिलेको जनाएको छ । मुख्य गरी अन्तरराष्ट्रिय उडानका जहाजलाई बमले उडाउने धम्की आएको हो ।
कयौँ होक्स कलसहितका घटना जोड्दा यस साता यस एयरलाइन्सलाई आएका धम्कीको संख्या नै १०० भन्दा माथि पुगेको छ।
एयरलाइन्सका अनुसार बमको धम्की मिलेकामध्ये ६ई-६३ दिल्ली जेद्दाह, ६ई-१२ इस्तान्बुल-दिल्ली, ६ई-८३ दिल्ली-दम्माम, ६ई-६५ कोझिकोड-जेद्दाह, ६ई-६७ हैदराबाद-जेद्दाह, ६ई-७७ बेङ्गलुरु-जेद्दाह, ६ई-१८ इस्तान्बुल-मुम्बई, ६ई-१६४ मैङ्गलुरु-मुम्बई, ६ई-११८ लखनऊ-पुणे र ६ई-७५ अहमदाबाद-जेद्दाह रहेका छन् ।
एयरलाइन्स सूत्रले भारतीय सञ्चारमाध्मयलाई बताएअनुसार इन्डिगोसँगै भिस्तरा एयरलाइन्सका जहाजलाई पनि बमले उडाउने धम्की मिलेकोछ । सोमबार र मंगलवारको बीचमा यस्ता सुरक्षा चेतावनी आएका हुन् । यसले विमानस्थल र जहाजमा कडा सुरक्षा जाँच गर्नु परेको छ ।
भिस्ताराका प्रवक्ताले घटनाबारे अध्ययन भइरहेको बताएका छन् । सोमबार उडानमा रहेका भिस्ताराकाकेही जहाजलाई सामाजिक सञ्जालबाट सुरक्षा चेतावनी आएको हो ।
त्यसबारेमा कम्पनीले सुरक्षा अधिकारीहरूाई सतर्क गराएको उनले बताए । सुरक्षा अधिकारीको निर्देशन पालना गरेर सुरक्षा चेकजाँच गरेको उनले बताएका छन् ।
इन्डिगोले आफ्नो वक्तब्यमा यात्रु र चालक दलको सुरक्षामा गम्भीर रहेको बताएको छ । यसबारेमा सम्बन्धित अधिकारीसँग मिलेर काम गरिरहेको पनि उनले बताएका छन् ।
यसैबीच मंगलबार त्रिभुवन विमानस्थलमा अवतरण गरेको भिस्ताराको जहाजमा पनि बम राखेको सूचना आएको छ ।
नेपाल नागरिक उड्डयन प्राधिकरणका अनुसार ह्वाट्सएपमार्फत उक्त धम्की दिइएको थियो । सूचनापछि विमानमा रहेका सबै यात्रुलाई बाहिर निकालिएको छ ।
अहिले विमानलाई छुट्टै राखेर सुरक्षाकर्मीले जाँच गरिरहेका छन् । यूके १५५ कलसाइनको यो विमान दिल्लीबाट साढे ४ बजे काठमाडौं अवतरण भएको थियो ।
अहिले भारतमा हरेक दिन विमानमा बम रहेको धम्की आइरहेको र सयौँ उडान प्रभावित भइरहेका छन् । त्यसको असर सिधा उडान रहेको नेपालमा पनि देखिएको हो ।
प्रतिक्रिया लेख्नुहोस्:-