लमजुङ । सदरमुकाम बेसीशहरस्थित त्रिवेणी युवाक्लवले आयोजना गर्दै आएको त्रिवेणी कपको ३१ औं संस्करण बिहिवारदेखि बेसीशहरमा सुरु भएको छ ।
गण्डकी प्रदेश सभा सदस्य एवं आयोजक त्रिवेणी युवा क्लवका पूर्वअध्यक्ष भेषबहादुर पौडेलले जिल्लाकै सर्वाधिक राशीको त्रिवेणीकप खुल्ला फुटवल प्रतियोगिताको उद्घाटन गरेका हुन् । कार्यक्रम उद्घाटन गर्दै पौडेलले सदरमुकाममा रहेको खेलमैदानलाई थप व्यवस्थित गर्न प्रदेश सरकारमा पहल गर्ने प्रतिवद्धता जनाए ।
बेंसीशहर नगरपालिका प्रमुख गुमानसिंह अर्यालले खेलकुदलको विकासका लागि स्थानीयतह देखि प्रदेश र संघीयस्तरमा नै नयाँ र फरक ढंगले ठोस कार्यक्रम तथा योजना निर्माण गर्नुपर्ने बताए ।
त्रिवेणी युवा क्लबका अध्यक्ष राजकुमार घिमिरेको अध्यक्षतामा भएको उद्घाटन कार्यक्रममा उपाध्यक्ष टेकजंग गुरुङले स्वागत मन्तव्य राखेेेेका थिए । कार्यक्रमको सञ्चालन बिलम अधिकारीले गरे । प्रतियोगितामा यसवर्ष कूल २१ टिमले सहभागिता जनाएको प्रतियोगितामा विभागीय टिमहरु त्रिभुवन आर्मी, महेन्द्र पुलिस क्लव साथै क्वीन गोर्खाज युकेलगायत प्रतिष्ठित टीमहरुले भाग लिन खेल संयोजक सिजन श्रेष्ठले बताए ।
उद्घाटन सँगै सुन्दरबजार फुटवल क्लवले आयोजिक त्रिवेणी युवा क्लवलाई ३–१ गोल अन्तरले हराएको छ । लगातार ३ गोल गरेको सुन्दरबजार फुटवल कलवले पहिलो हाफमा कुनै गोल गर्न सकेन । दोस्रो हाफको २ मिनेटमै जर्सी नं. १७ का दिपेश घलेले गोल फर्काएपछि आयोजक त्रिवेणीसंग खेल बराबरी भएको थियो । त्यसपछिको रोमाञ्चक खेलमा सुन्दरबजारका तर्फबाट २२ औं मिनेटमा जर्सी नं. २३ का सरोज तामाङले फ्रि किकमार्फत गोल गरेपछि थप हौसिएको सुन्दरबजार टीमका जर्सी नं. ७ का एरोन थापाले दोस्रो हाफको ३३ औं मिनेटमा गोल गर्दै आफ्नो टिमलाई जित सुनिश्चित गरेको हो । दोस्रो हाफमा लगातार ३ गोल गरेको सुन्दरबजार फुटवल क्लवले अब पुस १६ गते लमजुङ मस्र्याङ्दी युवा क्लवसंग खेल्नेछ । शुक्रबारको पहिलो खेल बेंसीशहर नगरपालिका र दोर्दी गाउँपालिकाबीच बिहान साँढे ९ बजे हुनेछ । दोस्रो खेल सामना युवा क्लव तुरतुरे र काष्ठमण्डम रेष्टुरेन्ट एण्ड बार फुटवल क्लव काठमाडौंबीच मध्यान्ह साँढे १२ बजे हुने भएको छ । शुक्रबारको अन्तिम खेल पेन्गुइन एजुकेशन भरतपुर २४ र ठडराई अधिकारी समाज दुइथोकबीच दिउँसो साँढे २ बजे हुनेछ ।
प्रतियोगितामा विजयी टीमलाई ८ लाख रुपैयाँ, त्रिवेणी कप, जनही स्वर्णपदक र प्रमाणपत्र प्रदान गरिने भएको छ । उपविजेताले ४ लाख रुपैयाँ, जनही रजतपदक र प्रमाणपत्र पाउनेछन् । सेमीफाइनल पराजित २ टीमलाई १–१ लाख रुपैयाँ प्रदान गरिने भएको छ । सर्वोकृष्ट खेलाडी र सर्वाधिक गोलकर्तालाई नगद २०–२० हजार रुपैयाँ दिइने आयोजक त्रिवेणी युवा क्लवका सचिव प्रवीण वाग्लेले बताए ।
प्रतिक्रिया लेख्नुहोस्:-