पोखरा / रसुवाको भोटेकोशी नदीमा आएको विनाशकारी बाढीमा परी ज्यान गुमाएका तथा सम्पर्कविहीन सुरक्षाकर्मीका परिवारलाई राहत तथा सहायता उपलब्ध गराउने निर्णय सुरक्षा निकायहरूले गरेका छन् । बाढीमा नेपाली सेनाका ४५, नेपाल प्रहरीका २५ र सशस्त्र प्रहरी बलका १४ गरी ८४ जना सुरक्षाकर्मी सम्पर्कविहीन रहेको जनाइएको छ ।
सशस्त्र प्रहरी बलले बाढीमा ज्यान गुमाएका आफ्ना कर्मचारीका आश्रित परिवारलाई सरकारी मापदण्ड तथा संगठनका राष्ट्रसेवकबाट हुने सहयोगसमेत गरी तत्काल २५ लाख रुपैयाँ राहत उपलब्ध गराउने निर्णय गरेको छ । मृतक कर्मचारीले कल्याण कोषबाट लिएको ऋणसमेत मिनाहा गर्ने निर्णय भएको छ ।
त्यस्तै, मृतकका सन्तानलाई नेपाल एपीएफ स्कुलमा कक्षा १० सम्म निःशुल्क अध्ययनको व्यवस्था, आश्रित परिवारका एक सदस्यलाई सीपमूलक तालिम तथा रोजगारीका लागि सहयोग र उपयुक्त स्थानमा स्मारक निर्माण गर्ने निर्णय सशस्त्र प्रहरीले गरेको छ । बाढीबाट ज्यान जोगाउन सफल पाँच कर्मचारीलाई जनही ५० हजार रुपैयाँ प्रोत्साहन पुरस्कार दिने निर्णयसमेत भएको छ ।
बाढीबाट प्रभावित बहालवाला कर्मचारीका परिवार तथा अवकाश प्राप्त कर्मचारीका हकमा पनि सशस्त्र प्रहरीले राहतको व्यवस्था गरेको छ । मृत्यु वा घरबारविहीन भएमा १ लाख रुपैयाँ र घाइते भएमा ५० हजार रुपैयाँसम्म आर्थिक सहयोग उपलब्ध गराइने जनाइएको छ ।
विपद्को यस घडीमा सशस्त्र प्रहरीका कर्मचारीको ३ देखि १५ दिनसम्मको तलब योगदान गरी प्रधानमन्त्री दैवी प्रकोप उद्धार कोषमा १५ करोड ५० लाख रुपैयाँ जम्मा गर्ने निर्णयसमेत भएको छ ।
नेपाल प्रहरीले पनि बाढीमा ज्यान गुमाउने प्रहरी कर्मचारीका परिवारलाई प्रहरी नियमावलीबमोजिम प्राप्त हुने सेवा–सुविधाबाहेक थप १० लाख रुपैयाँ राहत उपलब्ध गराउने निर्णय गरेको छ । दिवंगत प्रहरी कर्मचारीले नेपाल प्रहरी कल्याण कोषबाट लिएको विशेष सापटी मिनाहा गर्ने, परिवारका इच्छुक एक सदस्यलाई सीपमूलक तालिम तथा रोजगारीका लागि पहल गर्ने र सन्ततिलाई नेपाल प्रहरी स्कुलमा निःशुल्क अध्ययनको व्यवस्था मिलाउने निर्णय भएको छ ।
यसैबीच सरकारले बाढी प्रभावित क्षेत्रमा अग्रपंक्तिमा खटिएका सुरक्षाकर्मी तथा राष्ट्रसेवक कर्मचारीका लागि विशेष सुविधा घोषणा गरेको छ । भदौ १८ गते बसेको मन्त्रिपरिषद् बैठकले खोज तथा उद्धारमा खटिने सुरक्षाकर्मी र राष्ट्रसेवक कर्मचारीलाई जोखिम भत्ता तथा खाजा खर्च उपलब्ध गराउने निर्णय गरेको हो । उद्धारका क्रममा घाइते भए निःशुल्क उपचार र मृत्यु भए परिवारलाई १० लाख रुपैयाँ राहत दिने निर्णय पनि मन्त्रिपरिषद्ले गरेको छ ।
भोटेकोशी बाढीपछि खोज तथा उद्धारमा नेपाली सेना, नेपाल प्रहरी र सशस्त्र प्रहरी बल अग्रपंक्तिमा खटिएका छन् । नेपाली सेनाका ४५ जना सुरक्षाकर्मी सम्पर्कविहीन रहे पनि सेनाले मृतक तथा प्रभावित परिवारलाई राहत दिने विषयमा भने अहिलेसम्म निर्णय गरिसकेको छैन । सेनाका टोलीहरू भने विपद् प्रतिकार्य, खोज तथा उद्धारमा निरन्तर खटिरहेका छन् ।
प्रतिक्रिया लेख्नुहोस्:-