पोखरामा आयुर्वेद व्यवसायी संघ गण्डकीको अधिवेशन सम्पन्न, नयाँ नेतृत्व चयन

 नेपाल आयुर्वेद औषधि व्यवसायी संघ (NADA) गण्डकी प्रदेशको वार्षिक साधारणसभा तथा तेस्रो अधिवेशन शनिबार पोखराको लेकसाइडस्थित क्रिस्टल महलमा सम्पन्न भएको छ ।

अधिवेशनबाट विष्णा शर्मा चापागाईंको अध्यक्षतामा नयाँ कार्यसमिति निर्वाचित भएको छ । उपाध्यक्षमा रमेश चापागाईं, महिला उपाध्यक्षमा नीरा राना, सचिवमा राजेन्द्र अधिकारी र कोषाध्यक्षमा रामजी प्रसाद आचार्य चयन भएका छन् । सह-कोषाध्यक्ष श्रीकृष्ण विश्वकर्मा र  सदस्यहरूमा अनिल घिमिरे, परमानन्द भण्डारी, रामराज अधिकारी, प्रवीण ताम्राकार र हरिहर खतिवडा रहेका छन् ।

अन्य पदहरूमा सर्वसम्मत चयन भए पनि कोषाध्यक्ष पदका लागि भने चुनाब भएको थियो । उक्त पदमा विष्णु बस्याल र रामजी प्रसाद आचार्यबीच प्रतिस्पर्धा भएको थियो । कुल मतको करिब ७० प्रतिशत प्राप्त गर्दै आचार्य विजयी भएका हुन् । उक्त प्रतिस्पर्धाले अधिवेशनलाई थप सक्रिय र उत्साहपूर्ण बनाएको आयोजकले जनाएको छ ।

संघका केन्द्रीय अध्यक्ष रामचन्द्र बुढाथोकीले आयुर्वेद क्षेत्रको प्रवर्द्धन, व्यवसायको मर्यादा र विस्तारमा जोड दिनुपर्ने बताए । उनले यस क्षेत्रको विकासका लागि राज्यले प्रभावकारी नीति तथा सहयोग आवश्यक रहेको धारणा व्यक्त गरे ।

केन्द्रीय महासचिव लेखनाथ भुसाल, निवर्तमान अध्यक्ष जंगराज गिरी, पूर्व अध्यक्ष लोकेन्द्र चापागाईं, पूर्व महासचिव किरण शर्मा र पूर्व केन्द्रीय उपाध्यक्ष कृष्ण राउतको उपस्थिति रहेको थियो । साथै अतिथिहरूमा संस्थापक अध्यक्ष राजु पौडेल, केन्द्रीय सचिव कृष्ण तिमिल्सिनालगायत सहभागी थिए । गण्डकी प्रदेशका ११ जिल्लाबाट व्यवसायीहरूको उल्लेख्य सहभागिता रहेको आयोजकले जनाएको छ ।

गण्डकी प्रदेश अध्यक्ष डा. दिपक भुसालको सभाध्यक्षतामा सम्पन्न कार्यक्रमको सञ्चालन रमेश चापागाईंले गरेका थिए ।