पोखरामा शुक्रबार केपी ओली कप टि २० क्रिकेट प्रतियोगिताको फाइलन खेल चलिरहेको थियो । समुह चरणबाटै अपराजित रहेको आर्मीले समुह चरणमा चिठ्ठा परेर आए झै भएको मधेश प्रदेशको सामना गर्दै थियो ।
मधेशले पहिलो खेलमै पुलिस सँग हार व्यहोर्दै अन्तिम चारको यात्रा टुंग्याउने स्थितिमा सुदुरपश्चिमले पुलिसलाई हराउँदा सेमिफाइनलमा प्रवेश गरेको थियो । मधेशले सुदुरलाई भने हराएको थियो । जब समूह चरणमा पुलिसले अन्तिम खेल खेल्दै थियो त्यही बेला मधेशका खेलाडी अनिल साह र टिम म्यानेजर घर फर्किन टिकट काटी सकेका थिए । अन्य खेलाडी पनि जाने तरखरमै थिए । होटलमा प्याकिङ गरिसकेका थिए खेलाडी टिकट काटेर जाने तरखरमै रहेको बेला सुदुरले पुलिसलाई हरायो । जुन मधेशका लागि अपत्यारिलो क्षण थियो ।
घर हिडिसकेको मधेस फर्किएर आयो र लग्यो पाचँ लाख रुपैयाँ सहित उपाधी ।
मधेशले सेमिफाइनलमा समेत अप्रत्यासित प्रदर्शनी गर्दै फाइनलको यात्रा तय गरेको थियो । १० राष्ट्रिय खेलाडी सम्मिलित बलियो आर्मी विरुद्ध ३ राष्ट्रिय खेलाडी सम्मिलित मधेशले सामना गर्यो । अधिकांस स्थानिय खेलाडी रहेको मधेस सामु आर्मीलाई रन बनाउन निकै मुस्किल भयो ।
टस जितेर मधेशले पहिला ब्याटिङ गर्दै आर्मीलाई १३६ रनको विजयी लक्ष्य दिएको थियो । मध्यम लक्ष्य पाएपछि जवाफी ब्याटिङमा उत्रिएको आर्मीले सामान्य सुरुवात गर्यो । पावर प्ले सकिदासम्म आर्मी ३४ रनमा १ विकेट गुमाएको स्थितिमा थियो । १० औं ओभरको खेल सकिदासम्म आर्मी ५७ रनमा २ विकेट गुमाएको स्थितिमा थियो । त्यो आर्मीका लागि सामान्य जस्तै थियो । तर ११ औं ओभरको खेल भने आर्मीका लागि निकै दुर्भाग्यपूर्ण बन्यो । मधेसले खेललाई पुर्ण आफ्नो हातमा लिएको थियो । गुड प्लेसमा बलिङ अनि बोर्डमा धेरै भन्दा धेरै रन बनाउने लक्ष्यमा रहेको मधेसले अन्ततः राष्ट्रिय खेलाडिले भरिएका ३ विभागीय टोलि पुलिस, एपिएफ र आर्मीलाई हराउदै ऎतिहासिक जित निकाल्यो ।
घरेलु क्रीकेटमा यी नै ३ विभागको दबदबालाई घर फर्किएको मधेसले तोडिदियो ।
र यो तोडिनुमा फाइनल खेलको त्यो ११ औं ओभरको खेल थियो । मधेशका कप्तान हरिशंकर शाहले प्रहार गरेको त्यो ११ औं ओभरको उत्कृष्ट बलिङले ३ विकेट झार्यो । जुन आर्मीका लागि सपना जस्तै भयो र अपराजित आर्मीको यात्रामा संकट लाग्यो र अन्ततः मधेश सँग ११ रनको हार व्यहोर्न बाध्य भयो । १० ओभरको खेल सकिदाँ ५७र२ बाट ११ ओभरको समाप्ती हुँदा आर्मी ५८र५ मा पुग्यो । मधेशका कप्तान हरिशंकर शाहले प्रहार गरेको त्यो ओभरको पहिलो बलमा आर्मीका कप्तान विनोद एलबी डब्लु आउट हुन पुगे । जुन आर्मीका लागि तेस्रो झट्का थियो । लगत्तै तेस्रो बलमा बसिर पनि एलबी डब्लु हुन पुगे । सोही ओभरको पाँचौ बलमा आर्मीको हिटर कुशल मल्ल पनि शुन्यमै पेभिलियन फर्किए । त्यसअघि आर्मीले पहिलो विकेटको रुपमा ओपनर सन्तोष कार्कीलाई पाँचौ ओभरको चौथो बलमा गुमाएको थियो । पवन सर्राफको बलमा कार्की १६ रनमा एलबी डब्लु हुन पुगेका थिए । ८ औं ओभरको तेस्रो बलमा रोहित पौडेल ५ रनमा क्याच आउट भए । प्रतिक यादवको बलमा पौडेल मायान यादवबाट क्याच आउट भए । १३ औ ओभरको पाँचौ बलमा राजेश पुलामी ३ रनमा क्याच आउट भए । हरिशंकरको बलमा उनी पवन सर्राफबाट क्याच आउट भए ।
मधेशका लागि हरिशंकर शाहले ४ ओभरमा १९ रन खर्चेर ४ विकेट लिए । प्रदिप पासवानले २ तथा प्रतिक यादवले १ विकेट लिए ।
त्यसअघि टस जितेर ब्याटिङ रोजेको मधेशले २० ओभरमा ८ विकेट गुमाउँदै १ सय ३५ रन बनायो । मधेशको सुरुवात भने सुखद् रह्यो । पहिलो ओभरमै ११ रन बटुलेको मधेशले पहिलो विकेटको रुपमा अनिल शाहलाई गुमायो । सोमपाल कामीले प्रहार गरेको दोस्रो ओभरको चौथो बलमा अनिल क्याच आउट हुन पुगेका थिए । छैटौं ओभरको चौथो बलमा कप्तान हरिशंकर २७ रनमा आउट भए । विवेक यादवको बलमा राजेश मगरबाट क्याच आउट भए । लगत्तै सातौं ओभरको दोस्रो बलमा इमरान शेख स्टम्प्ट आउट भए । रन लिने क्रममा अघि बढ्दा उनी ८ रनमा आउट भए । सहाब आलमको बलमा स्टम्प्ट भए ।
नवौं ओभरको पाँचौ बलमा मायान यादव ३ रनमा बोल्ड भए । सहावको बलमा उनी बोल्ड भएका हुन् । ११ औं ओभरको तेस्रो बलमा पवन सर्राफ ९ रनमा सहाबकै बलमा बोल्ड भए । १४ औं ओभरको छैटौं बलमा हिमांसु दत्त १४ रनमा बोल्ड भए । वसिर अहमदको बलमा उनी बोल्ड भए । १८ औं ओभरको पहिलो बलमा विशाल सुस्लिङ यादवको बलमा भीमसार्कीबाट १० रनमा क्याच आउट भए । लगत्तै रुपेश सिंह डक आउट भए ।
आर्मीका लागि विवेक यादव र सहाव आलमले सर्वाधिक ३र३ विकेट लिए । सोमपाल कामी र वसिर अहमदले १र१ विकेट लिए ।
हरिशंकर सर्वोत्कृष्ट, सन्दिप उत्कृष्ट बलर
प्रतियोगिताको फाइनल खेलमा आर्मीलाई हराउन महत्वपुर्ण भूमिका खेलेका मधेशका कप्तान हरिशंकर शाह प्रतियोगिताको सर्वोत्कृष्ट खेलाडी घोषित भए । उनले फाइनलमा ४ विकेट लिए । उनले नगद ३५ हजार हात पारे ।
उत्कृष्ट बलर बागमतीका कप्तान सन्दिप लामिछाने घोषित भए । उनले ३ खेलमा १० विकेट लिए । यस्तै उत्कृष्ट ब्याटर बागमतीकै रित गौतम घोषित भए । गौतमले प्रतियोगिताभर १७० रन बताएका थिए । गौतम र लामिछानेले २०/२० हजार प्राप्त गरे ।
प्रतिक्रिया लेख्नुहोस्:-