काठमाडौं । काठमाडौंमा चाडपर्वलाई लक्षित गरी उच्च सतर्कता अपनाइएको छ । बिजयादशमी, शुभ दिपावली, छठलगायतको पर्वलाई मध्यनजर गरी सतर्कता अपनाइएको जिल्ला प्रहरी परिसर काठमाडौंले जनाएको छ ।
चाडपर्वको समयमा हुने सक्ने अपराधिक क्रियाकलापलाई मध्यनजर गरी सुरक्षा व्यवस्था मजबुत बनाइएको जिल्ला प्रहरी परिसर काठमाडौंका प्रमुख प्रहरी बरिष्ठ उपरीक्षक ९एसएसपी० भूपेन्द्र बहादुर खत्रीले बताए । उनका अनुसार अत्याधिक भिडभाड हुने थप १४ स्थानमा नागरिक सहायता कक्षा स्थापना गरिएको छ । जोखिम स्थानमा ड्रोनबाट पनि नियमित निरीक्षण भइरहेको छ । धेरै भिडभाड हुने १०० स्थानमा थप जनशक्ति परिचालन र गस्ती बढाइएको खत्रीले बताए ।
चाडपर्वको समयमा अपराधिक क्रियाकलाप हुन सक्ने भन्दै यसको नियन्त्रणमा ध्यान दिएको उनले बताए । प्रहरीले चोरलाई जसरी पनि पत्ता लगाउने र कारबाही गर्ने उनको भनाई छ । नागरिक, समाज प्रति प्रहरी सधैं जवाफदेही हुनपर्नेमा खत्रीले जोड दिए । नागरिक विना बर्दीको प्रहरी भएकाले आवश्यक सहयोग गर्न अपिल गरे । एसएसपी खत्रीले व्यक्तिगत सूचना गोप्य राख्नुपर्ने, घरको सुरक्षामा ध्यान दिनुपर्ने, धेरै गरगहना लगाएर हिँड्न नहुने भन्दै कुनै समस्या परेको खण्डमा ९८५१२०५५५५ नम्बरमा फोन वा म्यासेज गर्न अनुरोध गरेका छन् । कानुन विपरित चन्दा संकलन गर्ने जस्ता कार्य गर्नेको बारेमा जानकारी दिन आग्रह गर्दै प्रहरी सहयोग गर्न तयार रहेको बताए ।
उनले हाल ७७ जिल्लाबाट साइबर अपराध सम्बन्धि मुद्धा हेर्दै आएको बताए । पहुँच भएको स्थानमा कुनै घटना भएको ५ देखि १० मिनेटमा पुग्ने एसएसपी खत्रीले जानकराी दिए । बजारमा सिसि क्यामरा अभाव रहेको र जनशक्ति अभाव भएको भन्दै सरकारले ध्यान दिनुपर्ने बताए । जिल्लाको २१ लाख जनसंख्यामा ३ सय २० जना बराबर एक प्रहरी खटाउनुपर्नेमा ५ सय २९ जना बराबर एक जना प्रहरी खटिन परेको गुनासो खत्रीले गरे ।
खत्रीले चाडपर्व सुरक्षित, व्यवस्थित, स्वतन्त्र र भयरहित तरिकाले मनाउने वातावरण बनाउने प्रतिद्धता व्यक्त गरे । शुक्रबार गोकर्णेश्वर नगरपालिका ६ जम्मुडाँडा स्थित पूरानो छिमेकी पार्टी प्यालेस नारायणटारमा आयोजित बिजयादशमी, शुभ दिपावली तथा छठ पर्वको समयमा हुन सक्ने चोरी, लुटपाट, स्नाचिङ र जघन्य अपराध रोकथाम सम्बन्धि विषयमा छलफल तथा शुभकामना कार्यक्रमलाई सम्बोधन गर्दै उनले उक्त कुरा बताएका हुन् । कार्यक्रम सामुदायिक सेवा केन्द्र तथा सामुदायिक प्रहरी सेवा केन्द्र जोरपाटीद्धारा सञ्चालन गरिएको हो ।
प्रतिक्रिया लेख्नुहोस्:-