नयाँ दिल्ली । भारतमा कोरोना भाइरसको महामारी बढ्ने क्रम जारी छ । कोरोनाको दोस्रो लहर यथावत नै रहँदा तेस्रो लहर पनि प्रवेश गर्न लागेको छ ।
भारतका विभिन्न राज्यमा प्रतिबन्धहरु खुकुलो भइरहेको समयमा केही ठाउँहरुमा संक्रमणको बढ्दो संख्याका कारण चिन्ता बढ्न थालेको छ । सबैभन्दा महत्वपूर्ण कुरा के हो भने भारतका कतिपय राज्यहरुमा स्कूलहरु खोलिएकाले बालबालिकामा खतरा बढिरहेको छ ।
कर्नाटकको बैङ्लोरमा त्यस प्रकारको नतिजा देखिन थालेको छ । कोेरोना भाइरस संक्रमण केही कम भएपछि विभिन्न ठाउँका स्कूल–कलेज पुन: सञ्चालन गरिएको छ । बैङ्लोरमा पनि त्यस्तै गरिएको छ ।
तर, भर्खरै देखिएको तथ्यांक भने त्रास उत्पन्न गराउने किसिमको छ । बैंङ्लोरमा करीब ६ दिनमा तीन सयभन्दा बढि बालबालिका कोरोनाको चपेटामा आएका छन् । बैंङ्लोर जस्तो ठूलो शहरमा यस प्रकारको तथ्यांक तिव्र गतिमा बढिरहेको छ ।
बैंङ्लोर प्रशासनद्वारा सार्वजनिक गरिएको तथ्यांक अनुसार ० देखि ९ वर्षका करीब १२७ र १० देखि १९ वर्ष उमेर समुहका करीब १७४ जना बालबालिका कोभिड पोजिटिभ भेटिएका छन् । उक्त तथ्यांक अगस्ट ५ देखि १० बीचको हो ।
उत्तर भारतको कुरा गर्ने हो भने पनि त्यहाँका स्कूल–कलेज खुलेपछि कोरोना फैलने प्रकोपको देखिएको छ । हिमाञ्चल प्रदेशमा करीब ६२ छात्र कोभिडको चपेटामा आएका छन् भने पञ्जाबमा पनि २७ स्कूले विद्यार्थी कोरोना पोजिटिभ भएका छन् ।
हरियाणाका स्कूलमा पनि कोरोना संक्रमण देखिन थालिसकेको छ । स्कूलबाट लगातार विद्यार्थी संक्रमित भएको खबरका कारण भारत सरकार यस बारेमा सोच्न बाध्य भएको छ । अहिले हिमाञ्चल प्रदेशले अगस्ट २२ सम्म स्कूल बन्द गर्ने बताएको छ ।
पञ्जाबमा पनि स्कूलहरुमा कडा नियम लगाउने तयारी भएको छ । हरियाणामा कक्षा नौदेखि १२ सम्म गत जुलाईमा स्कूल खोलिएको थियो भने पञ्जाबमा अगष्टको प्रारम्भदेखि नै स्कूल खोलिएको थियो । हरियाणामा पनि अगष्टदेखि नौ देखि १२ कक्षासम्मका विद्यार्थीहरुलाई स्कूल बोलाइएको थियो ।
अहिले कोरोनाको दोस्रो लहर पूर्ण रुपले समाप्त भएको छैन । त्यसैले राज्य सरकारद्वारा सतर्कता अपनाउनु आवश्यक छ भन्ने कुरा केन्द्रिय स्वास्थ्य मन्त्रालयद्वारा पनि बारम्बार भनिएको थियो । भारतका केरला, महाराष्ट्र, कर्नाटक, तमिलनाडुसहित अन्य राज्यहरुमा पनि संक्रमण लगातार बढिरहेको छ ।
प्रतिक्रिया लेख्नुहोस्:-