हिमाली जिल्ला मनाङमा १८ वर्षमाथिका सबै नागरिकले कोभिडविरुद्धको खोप पाएका छन् । जेठ १४ र ३१ गतेको बाढीपहिरोले सदरमुकाम चामेलगायत अन्य स्थानमा क्षति पुर्याए पनि स्वास्थ्यकर्मी खोप प्रदान गर्न सफल भएका हुन् ।
बाढीपहिरोले बाटो बगाएपछि नार्पाभूमिमा पोखराबाट हेलिकप्टरबाट खोप पुर्याइएको थियो । स्वास्थ्य कार्यालय मनाङका निमित्त प्रमुख बद्री आचार्यका अनुसार १८ वर्षमाथिका ४ हजार १ सय ९८ जनाले खोप लगाएका छन् । भर्खरै कोभिड लागेका र गर्भवती महिलाले भने लगाएका छैनन् । ‘कतिपय जिल्लाबाहिर हुनुहुन्छ । तोकिएको उमेर समूहले आ–आफ्नो ठाउँमा लगाए होलान् । मनाङमा भने खोप लगाउन योग्य १८ वर्षमाथिका नागरिक छुटेका छैनन्,’ उनले भने ।
उनका अनुसार २ हजार ९६ जनाले कोभिसिल्ड लगाएका छन् । यसमा १ सय ६५ जनाले दोस्रो खोप लगाउन बाँकी छ । ७५ जनाले भेरोसेल दोस्रोपटक पनि लगाइसकेका छन् । २ हजार २७ जनाले जोन्सन एन्ड जोन्सनको खोप लगाएका छन् । माघ १४ मा जिल्ला अस्पतालबाट खोप सेवा सुरु गरिएकामा पछिल्लो समय जिल्लाभरको २८ वटा वडामा रहेको २८ वटै खोप केन्द्रबाट दिइएको थियो ।
उब्रिएको कोभिसिल्डको ६ सय ८० डोज हेलिकप्टरमार्फत लमजुङ पठाइएको र जोन्सन एन्ड जोन्सन अझै ४ सयभन्दा बढी डोज बाँकी रहेको आचार्यले बताए । स्वास्थ्य कार्यालयका अनुसार ङिस्याङ गाउँपालिकामा १ हजार २ सय ९१ जनाले खोप लगाएका छन् । चामे गाउँपालिकामा १ हजार ४ सय ३७, नासों गाउँपालिकामा १ हजार ७० र नार्पाभूमि गाउँपालिकामा ४ सय जनालाई खोप लगाइएको छ ।
खोप समन्वय समितिका संयोजक एवं प्रमुख जिल्ला अधिकारी विष्णु लामिछानेले बाढीपहिरोका बाबजुद पनि खोप सेवा प्रदान गर्न सफल भएको बताए ।
प्रतिक्रिया लेख्नुहोस्:-