चितवन ८ साउन । पूर्वीचितवनको राप्ती नगरपालिका–३ का २३ वर्षीया सुजिता भण्डारी मृत्युको अनुसन्धान गरिरहेको प्रहरीले नयाँ क्लु भेट्टाएको छ ।
नातामा दाजु पर्ने सुकदेव भण्डारीसंगको प्रेम नै उनको मृत्युको कारण रहेको प्रहरीको प्रारम्भिक अनुसन्धानले देखाएको छ । प्रहरीले झापाको झापा गाउँपालिका–६ शरणामतिका २३ वर्षीय सचिन भनिने सुकदेव भण्डारीलाई पक्राउ गरेपछि उनीहरुको सम्बन्ध सार्वजनिक भएको हो ।
सुकदेव नातमा सुजिताको ठूलो बाको छोरा हुन् । उनीहरु दाजु बहिनी भएपनि प्रेम सम्बन्धका रहेको अनुसन्धनमा खुलेको प्रहरीले जनाएको छ । प्रेम सम्बन्धमा रहेका उनीहरु एक अर्कासंग टाढिएर बस्न नसक्ने जनाउँदै सुजिताले विवाह प्रस्ताब गरेको र सुकदेवले अस्विकार गरेपछि घटना भएको प्रहरी उपरीक्षक ओमप्रसाद अधिकारीले जानकारी दिए ।
असार ९ गते उनीहरुबीच विवाहका बिषयमा विवाद हुँदा सुजिताले ‘विवाह नगरे मर्छु’ भनेको र सुकदेवले ‘जे गर्ने हो गर’ भनेको प्रारम्भिक अनुसन्धानमा देखिएको प्रहरीले जानकारी दिएको छ ।
मृतक सुजिताको भिसेराको नतिजा आउन बाँकी रहेको छ भने सुकदेव विरुद्ध आत्महत्या दुरुत्साहन अभियोगमा मुलुकी अपराध संहिता २०७४ परिच्छेद १२ ज्यानसम्बन्धि कसूर अन्तर्गत दफा १८५ मा पाँच वर्ष कैद र रु ५० हजारसम्म जरिवानाको माग दावि प्रहरीले गरेको छ ।
प्रतिक्रिया लेख्नुहोस्:-