विमानस्थल र विमानमा पालना गर्नु पर्ने स्वास्थ्य मापदण्ड यस्ता छन

कोभिड महामारीको दोस्रो लहरका कारण बन्द गरिएका आन्तरिक हवाई उडानहरू बिहीवारदेखि खुला गरिएको छ।
जनस्वास्थ्यका मापदण्ड पालना गर्ने गरी अर्को निर्णय नभएसम्म यसअघि हुँदै आएका उडानको आधा सङ्ख्यामा गर्ने गरी आन्तरिक उडान खोलिएको अधिकारीहरूले बताएका छन्। उच्चतम सावधानीका लागि यात्रुहरूले कोभिड १९ सङ्कट व्यवस्थापन केन्द्र सीसीएमसीले व्यवस्था गरेको उडानसम्बन्धी फारम अनिवार्य भर्नुपर्ने नियम बनाइएको छ।

पालना गर्नुपर्ने मापदण्ड
विमानस्थल र विमानमा पालना गर्नु पर्ने स्वास्थ्य मापदण्ड पालना गर्न आफूहरूले सर्वसाधारण, विमान कम्पनी र सबै विमानस्थलका प्रमुखहरूलाई जानकारी दिएको सरकारी भनाइ छ।
क्षेत्रीका अनुसार मास्क लगाउने, दूरी कायम गर्नुपर्ने, जहाजमा बस्दा फेसशील्ड लगाउनुपर्ने, टर्मिनलमा भिडभाड गर्न नहुने र उडानबीच केही दुरी कायम गरिनुपर्ने जस्ता मापदण्डहरूलाई सुरक्षा प्रोटोकलमा राखिएको छ। विमान कम्पनीहरूले गत वर्ष पनि सङ्क्रमणकै बीचमा उडानहरू गरेको अनुभव भएको र त्यसै अनुसार मापदण्ड बनाइएको उनले बताएका छन्।

विमानस्थल पुग्न अगावै अनलाइन फर्म भर्नुपर्ने
तर त्यसका लागि यात्रुहरूले पनि नियम पालना गरिदिनु पर्ने नेपाल वायुसेवा सञ्चालक सङ्घका कोषाध्यक्ष समेत रहेका बुद्ध एयरका बजार निर्देशक रुपेश जोशी बताउँछन्।
‘यात्रुहरूको हकमा मास्क त अनिवार्य छ। ज्वरो आएको हुनु भएन। सीसीएमसीको एउटा फर्म छ त्यो भरेर कोड नम्बर लिएर आएको हुनुपर्‍यो,’उनले भने। उक्त फर्म www.ccmc.gov.np/drms मा उपलब्ध रहेको र त्यसमा यात्रुहरूको नामथर, गन्तव्य, उडान नम्बर, सिट नम्बर, नागरिकता वा राहदानी नम्बर उपलब्ध गराउनुपर्ने हुन्छ। त्यसबाहेक गन्तव्यमा पुगेपछिको ठेगाना, मोबाइल नम्बर र ईमेल, नजिकको सम्पर्क व्यक्ति र ऊसँगको सम्बन्ध पनि उपलब्ध गराउनुपर्ने हुन्छ।