काठमाडौं २१ भदौ । कारागारभित्र रहेको होटलको मूल्य सूची बढाएको बिषयमा ललितपुरको नख्खुमा रहेको कारागारमा झडप भएको छ । नख्खु कारागारका नाइके र कैदीबन्दीबीच झगडाले उग्ररूप लिएपछि कुटाकुटसमेत भएको थियो ।
कारागारभित्रको होटलको मूल्यसूची अत्यधिक बढाइएको, सेवा–सुविधामा पनि मनोमानी गरेको र राम्रो व्यवहार नगरेको भन्दै कैदीहरूले आक्रोश पोखेका थिए । केहीबेर कैदी र नाइकेहरूबीच भनाभन भएर कुटाकुटसमेत भएको खबर पाउनासाथ महानगरीय प्रहरी परिसर ललितपुरबाट ४० जना प्रहरीको टोली कारागार पठाइएको प्रहरी उपरीक्षक प्रज्वल महर्जनले बताउनुभयो । कारागारको सुरक्षार्थ खटिएका नेपाल प्रहरी र सशस्त्र प्रहरी बलले बल प्रयोग गरेर स्थितिलाई नियन्त्रणमा लिएको थियो ।
कारागार व्यवस्थापन विभागका महानिर्देशक जनकराज दाहालले कारागारभित्रको विवाद मिलेको जानकारी दिए । उनले जेलभित्रको आन्तरिक समस्या भएकाले अहिले बन्दीहरुको गुनासो सुन्ने काम भइरहेको जानकारी दिए । उनका अनुसार कैदीहरूले आफ्नो गुनासाहरू लिखितरूपमा जेलर चिरञ्जीवी गिरीलाई बुझाएका छन् । उक्त निवेदनमा रासनमा घोटाला गरेको, टेलिफोन सुविधा सहज नबनाएको, सरकारले दिने अन्य सुविधामा पनि आफ्नो मनोमानी गरिएको उल्लेख छ ।
महानिर्देशक दाहालले निवेदनमा उठाइएका समस्याहरूलाई समाधान गरी आगामी दिनमा यस्तो स्थिति आउन नदिन पहलकदमी गर्नु भनेर कारागार प्रशासनलाई निर्देशन दिएको जानकारी दिए । हाल नख्खु कारागारमा करिब १४ सय जना कैदी रहेका छन् ।
प्रतिक्रिया लेख्नुहोस्:-