त्रिभुवन विश्वविद्यालय अन्तर्गतको इन्जिनियरिङ अध्ययन संस्थान (आइओई) द्वारा लिइएको २०८२ सालको स्नातक तहको प्रवेश परीक्षामा पोखराका विद्यार्थी आयुष पराजुलीले देशभरि पहिलो स्थान हासिल गरेका छन्।
पोखरा–१५, रामबजारस्थित एसओएस हर्मन माइनर माध्यमिक विद्यालयका छात्र पराजुलीले उत्कृष्ट नतिजासहित नेपाल टपर बन्न सफल भएका हुन्। यसअघि पनि सोही विद्यालयका विद्यार्थीहरूले प्रवेश परीक्षामा उत्कृष्ट प्रदर्शन गर्दै आएका थिए। गत वर्षका विद्यार्थी कृतन लामिछाने र सुयोग कोइरालाले समेत शीर्ष स्थान हासिल गरेका थिए।
विद्यालयका प्रधानाध्यापक चुडामणि सुवेदीले आयुषको सफलताले एसओएस विद्यालयको शैक्षिक स्तर थप उच्च भएको बताए। “यस उपलब्धिले विद्यालय मात्र नभई सम्पूर्ण पोखराको गौरव बढाएको छ,” उनले भने, “हामी विद्यार्थी, अभिभावक र शिक्षक–शिक्षिकाको मेहनतप्रति आभार व्यक्त गर्दछौं।”
आइओई प्रवेश परीक्षा नेपालकै प्रतिष्ठित र चुनौतीपूर्ण परीक्षामध्ये एक मानिन्छ। देशभरिबाट हजारौं विद्यार्थी सहभागी हुने यस परीक्षामा उत्कृष्ट स्थान हासिल गर्नु ठूलो उपलब्धि मानिन्छ ।
आयुषको सफलतासँगै एसओएस विद्यालयले लगातार दोस्रो वर्षसम्म नेपाल टपर उत्पादन गर्ने परम्परा कायम राखेको छ।
प्रतिक्रिया लेख्नुहोस्:-