पोखरा महानगर अध्यक्षमा मनीष के.सी.को उमेदवारी घोषणा

पोखरा, कास्की — राष्ट्रिय प्रजातन्त्र पार्टी (राप्रपा)का युवा नेता मनीष के.सी.ले राप्रपा कास्कीअन्तर्गत पोखरा महानगर कार्यसमितिको अध्यक्ष पदमा आफ्नो उमेदवारी सार्वजनिक गरेका छन्। उनले सोमबार एक वक्तव्य जारी गर्दै संगठनभित्र सुधार, पारदर्शिता, एकता र युवानिर्देशनात्मक नेतृत्व आवश्यक रहेको उल्लेख गर्दै आफू त्यसका लागि अग्रसर भएको बताए।

के.सी.का अनुसार राप्रपाले उठाउँदै आएको हिन्दू अधिराज्य, राजसंस्था तथा राष्ट्रिय पहिचान सम्बन्धी एजेण्डालाई प्रभावकारी रूपमा अघि बढाउन “नयाँ र सकारात्मक ऊर्जा” अनिवार्य भएको छ। उनले संगठनलाई मजबुत बनाउन पोखरा महानगरका ३३ वटै वडाका नेता, कार्यकर्ता तथा शुभेच्छुकसँग साथ र समर्थन जुटाइदिन अनुरोध गरेका छन्।

“एकताको बल, सुधारवादी सोच र राष्ट्रवादी दिशानिर्देशनले मात्रै राप्रपाको भविष्य उज्यालो हुन्छ,” के.सी.ले भने, “अनुभव र युवाशक्तिको संयोजनबाट राप्रपालाई फेरि जनताको मनमा स्थापित गर्न चाहन्छु।”

के.सी.ले पार्टीभित्र पारदर्शिता, सहज पहुँच र कार्यकर्तामुखी अभियान सञ्चालन गरेर संगठनलाई थप सशक्त बनाउने प्रतिबद्धता पनि व्यक्त गरे।

उनले आफ्ना समर्थकहरूलाई एकताबद्ध भई आगामी संगठनात्मक प्रक्रियालाई सफल बनाउन अपिल गर्दै, “जय राष्ट्रवाद ! जय राप्रपा !” भन्दै आफ्नो सन्देश समाप्त गरेका छन्।